صہیونی ریاست کے حکام نے مصر سے ملحق اسرائیلی سرحد پر سیکیورٹی دیوار کی تعمیر کے کام میں تیزی لانے کا فیصلہ کیا ہے۔ اس دیوار کا مقصد مصری سرحدوں کے ذریعے اسرائیل میں داخل ہونے والے افریقیوں کی آئے روز بڑھتی تعداد پر قابو پانا ہے۔ عبرانی ریڈیو کے مطابق اسرائیلی وزراء کی کمیٹی نے اپنے ہفتہ وار اجلاس میں سرحدوں پر واقع سیکیورٹی دیوار کی تعمیر میں تیزی لانے پر بات چیت کی اور کہا جتنا جلد ممکن ہو دیوار کی تکمیل کر لی جائے کیونکہ ان سرحدوں سے اسرائیل میں داخل ہونے والوں کی تعداد فی یوم تین شخص ہو گئی ہے۔ اسرائیلی قانون سازی امور کی وزراء کمیٹی نے ایک ہفتہ قبل مصر سے ملحق اسرائیلی سرحدوں پر ایک سکیورٹی دیوار کے منصوبے کی تصدیق کی تھی، کمیٹی کے بہ قول اسرائیل میں افریقا کے مہاجرین کی تعداد 26 ہزار تک پہنچ چکی ہے جس کو بڑھنے سے روکنا ہو گا۔