مقبوضہ فلسطین کے شہرحیفا میں جبل کرمل کے مقام پر جمعرات کو لگنے والی آگ بجھانے میں جہاں اسرائیل کے کئی سرکاری اور غیر سرکاری ادارے سرگرم رہے وہیں فلسطینی اور اردنی ٹیموں نے بھی آگ پر قابو پانے میں صہیونیوں کی مدد کی.
فلسطینی سرکاری نیوز ایجنسی "وفا” نے اپنی تازہ رپورٹ میں بتایا ہے کہ فلسطینی صدر محمود عباس اور وزیراعظم سلام فیاض نے حیفا میں جبل کرمل میں ہولناک آتش زدگی اور اس میں بیالیس صہیونیوں کی ہلاکت پر اسرائیل سے افسوس کا اظہار کیا ہے.
رپورٹ کے مطابق حیفا میں لگی آگ پر قابو پانے کے لیے مختلف ممالک کے آٹھ طیاروں اور تین ہیلی کاپٹروں نے بھی امدادی کاموں میں حصہ لیا، جبکہ اسرائیلیوں کے علاوہ فلسطینی اوراردنی امدادی ٹیمیں بھی امدادی کاموں مصروف دکھائی دیں.
دیگر ممالک میں روس، فرانس، آذر بائیجان اور اٹلی کی امدادی ٹیمیں شامل تھیں.خیال رہے کہ جمعرات کے روز حیفا میں جبل کرمل میں لگنے والی ھولناک آگ کے باعث دامون جیل میں قید 42 صہیونی قیدی ہلاک اور دسیوں افراد زخمی ہو گئے تھے. جیل میں فلسطینی خواتین اور دوسری قیدی بھی تھے تاہم وہ محفوظ رہے.