فلسطینی اتھارٹی آج کل نت نئے سکینڈلز کی زد میں ہے- روس کے دارالحکومت ماسکو میں فلسطینی اتھارٹی کے سفارت خانے میں تعینات فرسٹ سیکرٹری احمد خزعل نے اسرائیلی نیشنلٹی کا مطالبہ کردیا- نام نہاد ھولوکاسٹ کے حوالے سے منعقدہ یادگاری تقریب میں احمد غزعل نے فلسطینی سفارت خانے کے تمام ملازمین اور ماسکو میں فتح کے ارکان کی جانب سے یہودی کمیونٹی کے سربراہ بن لازار سے اظہار تعزیت کیا- انہوں نے کہا کہ فلسطینی سفارت کے ملازمین اس منحوس دن سے جڑی بری یادوں پر گہرے رنج و الم کا اظہار کرتے ہیں- احمد خزعل نے مزید کہا ’’میری خواہش ہے کہ ہم دنیا میں منتشر یہودیوں کے ساتھ مل کر ان لوگوں کے خلاف جدوجہد کریں جو یہودیوں کو ناپسند کرتے ہیں-‘‘ احمد خزعل نے گزشتہ برس کی غزہ جنگ کے حوالے سے صہیونی جارحیت کا جواز پیش کرتے ہوئے کہا کہ اسرائیل نے اپنے عوام کے دفاع کی جنگ لڑی- فلسطینی سفارت کار نے صہیونیوں سے مخاطب ہوتے ہوئے کہا ’’ہم کہتے ہیں کہ آپ کے دشمن ہمارے دشمن ہیں- ہم حماس کے دعوؤں کو قبول نہیں کرتے کہ اسرائیل نے جنگ کے دوران سیکڑوں فلسطینی شہریوں کو قتل کیا-‘‘ تقریب میں شریک فلسطینی صحافی کے مطابق تقریب کے اختتام میں احمد خزعل نے بن لازار سے خواہش کا اظہار کیا کہ وہ یہودی خاتون سے شادی کر کے اسرائیل منتقل ہونا چاہتے ہیں- احمد خزعل نے بن لازار سے ایسی یہودی خاتون کی تلاش کا مطالبہ کیا جو احمد خزعل سے شادی کے لیے تیار ہو- احمد خزعل کی اس خواہش کے جواب میں ماسکو میں یہودی مذہبی پیشواؤں کے سربراہ نے اس سلسلے میں ان سے تعاون کا وعدہ کیا-
