غزہ کی پٹی سے جمعہ کو اسرائیل کے قصبے عفاکیم کی جانب طویل فاصلے تک مار کرنے والا ایک راکٹ فائر کیا گیا ہے۔ تاہم اس سے کوئی جانی نقصان نہیں ہوا۔ غزہ کی پٹی سےتعلق رکھنے والے کسی فلسطینی گروپ نےفوری طور پر راکٹ حملےکی ذمے داری قبول نہیں کی۔ اسرائیلی فوج کے ایک ترجمان نے ایک بیان میں کہا ہے کہ سوویت ساختہ گراڈ طرز کا راکٹ گرنے سے ایک ٹینکر ٹرک تباہ ہوا ہے۔ گذشتہ کئی ماہ کے بعد غزہ سے اسرائیلی علاقے کی جانب اس نوعیت کا یہ پہلا حملہ ہے۔ گراڈ طرز کے راکٹ چالیس کلومیٹر تک مار کر سکتے ہیں۔ فلسطینی مزاحمت کار بالعموم اسرائیل کی جانب گھریلو ساختہ القسام راکٹ غزہ کی پٹی سے فائر کرتے ہیں۔ گراڈ طرزکے راکٹوں کی القسام راکٹوں سے رینج دگنا ہے۔ گذشتہ روز غزہ کی پٹی سےجنوبی اسرائیل کی جانب دو مارٹر گولے فائر کیے گئے تھے لیکن ان سے بھی کوئی جانی یامالی نقصان نہیں ہوا تھا۔ اس سے پہلے اسرائیلی فوج کےفضائی حملے میں غزہ شہر میں ایک فلسطینی مزاحمت کار شہید ہو گیا تھا جبکہ اسی ہفتے ایک اور اسرائیلی حملے میں دو فلسطینی مزاحمت کار شہید ہو گئے تھے۔