عید کے موقع پر مغربی کنارے میں محمود عباس ملیشیا نے حماس کے سیکڑوں کارکنوں کو تفتیش کے لئے مختلف تھانوں میں حاضر ہونے کے لئے سمن جاری کئے ہیں۔ مقبوضہ فلسطین میں عید الفطر جمعہ کے روز منائی جا رہی ہے اور اس موقع پر سیاسی مخالفین کی تھانوں میں پیشی کو ایک اشتعال انگیز کارروائی قرار دیا جا رہا ہے۔ مغربی کنارے میں حماس کے باخبر ذرائع نے بتایا کہ گذشتہ 48 گھنٹوں کے دوران محمود عباس ملیشیا کے کارکنوں نے انتہائی سرگرم دکھائے دیئے۔ ان کی سرگرمی کا محور دراصل حماس کے کارکنوں کی عید کے ایام میں تفتیش کی غرض سے تھانوں میں طلبی کے سمن کی تقسیم تھا۔ ذرائع کا کہنا ہے کہ محمود عباس انتظامیہ کے اس اقدام کی مثال نہیں ملتی کیونکہ عمومی طور پر عیدین کے مواقع پر قیدیوں کو رہائی دی جاتی ہے مگر مغربی کنارے میں فلسطینی انتظامیہ کے ہاں الٹی گنگا بہہ رہی ہے۔ حماس کے ذرائع نے مغربی کنارے میں فلسطینی انتظامیہ کے اس رویے کی مذمت کی ہے۔ ان کا کہنا ہے کہ عید کے دن شہریوں کو تفتیش کے لئے بلانے کا کیا مطلب ہے۔ اس اشتعال انگریز کارروائی کا کوئی جواز نہیں ہے۔ یاد رہے کہ عباس ملیشیا نے دو ہفتے قبل الخلیل آپریشن کے بعد بڑے پیمانے پر حماس کے کارکنوں کی گرفتاریاں شروع کر رکھیں ہیں۔ حراست میں لئے جانے والے حماس کے سیکڑوں کارکنوں میں صرف چند کو رہائی نصیب ہو سکی ہے۔