اسرائیلی حکام نے مغربی کنارے کے شمالی ضلع طوباس کے دو بھائیوں کے گھروں کو منہدم کرنے کا عندیہ دے دیا، اسرائیلی حکام کی جانب سے دو روز میں گھر خالی کرنے کے نوٹس بھجوا دیے گئے۔ علاقائی ذرائع کے مطابق طوباس کے علاقے الاغوار میں علی اور حسین نامی دو بھائیوں کو نوٹس بھجوائے گئے ہیں جن میں انہیں دو دن کے اندر اپنے گھر خالی کرنے کا کہا گیا ہے۔ ذرائع کے مطابق گھروں کے خالی کرنے کے نوٹس ان کے گھروں کو منہدم کرنے کے لیے دیے گئے ہیں، گھروں کو خالی کرنے کی وجہ بلااجازت گھروں کی تعمیر بتائی گئی ہے۔ واضح رہے کہ اسرائیلی انتظامیہ نے ان دنوں اغوار میں فلسطینیوں کو گھروں سے بے دخل کرنے کی مہم شروع کر دی ہے جس میں جائز طور پر بسنے والے علاقے کے رہائشیوں کو علاقے سے نکالا جا رہا ہے۔