مغربی کنارے اور بیت المقدس میں اسرائیلی فوج کی طرف سے پرامن فلسطینی مظاہرین پرحملوں کا سلسلہ دوبارہ شروع ہوگیا ہے۔ اتوار کے روز مغربی کنارے کے شہر الخلیل کے شمال میں عرب کیمپ میں مظاہرین اور اسرائیلی فوج میں جھڑپوں میں متعدد افراد زخمی ہوگئے جبکہ بیت المقدس میں اسرائیلی فوج کے حملوں میں کئی افراد کو گرفتار کر لیا گیا ہے۔
مقامی ذرائع کے مطابق چند نوجوانوں کی جانب سے صیہونی فوج پر پھتراؤ کیا، جس کے بعد قابض فوج ٹینکوں اور بکتر بند گاڑیوں کے ہمراہ کیمپ میں داخل ہو گئی، جس پرمقامی شہریوں اور قابض فوج کے درمیان دیر تک جھڑپیں جاری رہیں، اس دوران قابض فوج نے شہریوں کو بدترین تشدد کا نشانہ بنایا اور مظاہرین کو منتشر کرنے کے لیے بھاری آواز پیدا کرنے والے بم اور آنسوگیس کے گولے داغے۔ زہریلی آنسوگیس کے استعمال سے کئی افراد دم گھٹنے سے متاثر ہوئے۔
ادھر بیت المقدس میں گھر گھر تلاشی کےدوران قابض فوج نے شہریوں کو زد و کوب کرتے ہوئے بڑی تعداد میں شہریوں کو حراست میں لے کر انہیں تفتیش کے لیے نامعلوم مقام پر منتقل کر دیا۔ گرفتاری مہم کے دوران گرفتار ہونے والے یعقوب القواسمی، محمد الجعبہ، جہاد طہ اور محمد جابر کو "مسکوبیہ” پولیس اسٹیشن میں لے جایا گیا ہے جہاں ان سے تفیش جاری ہے۔
قابض فوج نے بیت المقدس کے مختلف علاقوں میں رہائش پذیر فلسطینی شہریوں کو خود کو حکام کے سامنے پیش ہونے کے نوٹس جاری کیے ہیں۔