مصر میں عوامی احتجاج اور کشیدگی کے باعث اسرائیل نے اپنے شہریوں کو مصر جانے سے روک دیا ہے جب کہ مصر میں پہلے سے موجود یہودیوں کو ہدایت کی گئی ہے کہ وہ پبلک مقامات پر نہ جائیں اور مسلسل اسرائیلی سفارت خانوں سے رابطے میں رہیں. صہیونی وزارت خارجہ کی جانب سے جاری ایک بیان میں مصر میں تازہ عوامی احتجاج کے تناظر میں اپنے شہریوں کو ہدایت کی ہے کہ وہ جتنا جلدی ممکن ہو مصر چھوڑ کر وطن واپس آئیں.یا کسی دوسرے ملک چلے جائیں. اس کےعلاوہ مصر جانے کی تیاریاں کرنے والے شہریوں بالخصوص اسرائیلی سیاحوں سے کہا گیا ہے کہ وہ مصر سیاحت کے لیے نہ جائیں کیونکہ موجودہ خراب حالات کے بعد کچھ بھی ہو سکتا ہے. خیال رہے کہ اسرائیل کے یہ بیان ایک ایسے وقت میں جاری کیا ہے جب ایک روز قبل صہیونی حکومت کے عہدیداروں نے مصر میں پرتشدد واقعات کے باوجود اپنے شہریوں کے حوالےسے اطمینان کا اظہار کیا تھا. یہودی حکام کا کہنا تھا کہ احتجاج معمول کا حصہ ہے اور صدر حسنی مبارک کی حکومت کو ا س سے کوئی خطرہ لاحق نہیں. وزارت خارجہ نے بیان میں یہویوں سے کہا ہے کہ وہ مصرجانے سے سختی سے گریز کریں اور تنبیہ کی ہے کہ اپنی مرضی سے جانے والے یہودی اپنی سلامتی کے خود ہی ذمہ دار ہوں گے.