اسرائیلی وزیر برائے لوکل گورنمنٹ عوزی لانڈاؤ نے دھمکی دی ہے کہ وہ مغربی کنارے کو اسرائیل کی جانب سے فراہم کردہ پانی بند کر سکتے ہیں۔ صہیونی وزیرنے بدھ کے روز اپنے ایک بیان میں کہا کہ ماضی میں کسی اسرائیلی حکومت نے مغربی کنارےکا پانی بند نہیں کیا تاہم ان کی حکومت ضرورت محسوس کرنے پر ایسا کر سکتی ہے۔
اسرائیلی وزیرنے الزام عائد کیا کہ مغربی کنارے کے فلسطینی شہری اسرائیل کا فلٹر کردہ پانی استعمال کر رہے ہیں، فلسطینی حکام کو چاہیے کہ وہ پانی صاف کرنے لیے خود انتظامات کریں، انہوں نے کہا کہ فلسطینی اتھارٹی نے پانی صاف کرنے کا خود انتظام نہ کیا تواسرائیل کی جانب سے صاف پانی کی فراہم بند کر دی جائے گی۔
صہیونی وزیرنے کہا کہ اسرائیل کی طرف سے فلسطینیوں کو فراہم کردہ پانی کا فلسطینی واٹر اتھارٹی صرف پچاس فیصد صاف کرتی ہے جبکہ یہودی آباد کاروں کو سترفیصد پانی کی صفائی کرنا پڑ رہی ہے۔