امریکی صدر باراک حسین اوباما نے اسرائیل کے ساتھ تعلقات کی مضبوطی کی یقین دہانی کراتے ہوئے کہا ہے کہ اسرائیل اور امریکا کے درمیان تعلقات پتھر کی طرح مضبوط ہیں۔
امریکی صدر نے یہ بیان ایک ایسے وقت میں دیا ہے جبکہ حال ہی میں امریکی نائب صدر جوز ف بائیڈن کے دورہ اسرائیل کے دوران صہیونی حکومت کی طرف سے بیت المقدس میں یہودی آباد کاری کے منصوبے کے اعلان کو واشنگٹن کی”توہین” قرار دیا تھا۔
مرکز اطلاعات فلسطین کے مطابق صدر اوباما نے بدھ کے روز امریکی نشریاتی ادارے” این بی سی” کو انٹرویو میں کہا کہ اسرائیل اور امریکا کے درمیان تعلقات "پتھر کی طرح مضوط ہیں”۔
انہوں نے کہا کہ وہ اسرائیل کی سلامتی کی ذاتی طور پر ضمانت دینے کو تیار ہیں، اسرائیل کو کمزور نہیں ہونے دیں گے۔
امریکی صدر نے مزید کہا کہ دوستوں کے درمیان اختلافات پیدا ہوتے رہتےہیں، تاہم یہ اختلافات مذاکرات اور بات چیت کے ذریعے دور کیے جا سکتے ہیں۔ انہوں نے کہا کہ امریکا کی خواہش ہے کہ فلسطینی اتھارٹی اور اسرائیل کے درمیان موجود اختلافات جلد ختم ہو جائیں۔ انہوں نے کہا کہ خطے میں قیام امن کے لیے اسرائیلی حکومت اور فلسطینی قیادت کو جرات مندانہ فیصلے کرنا ہوں گے۔