مقبوضہ بیت المقدس (فلسطین نیوز۔مرکز اطلاعات) اسرائیلی پولیس نے مسجد اقصیٰ میں نماز کی ادائیگی کے لیے آئے فلسطینیوں کو وحشیانہ تشدد کا نشانہ بنایا جس کے نتیجے میں متعدد فلسطینی زخمی ہوگئے۔ زخمیوں کو اسپتال منتقل کیا گیا ہے جہاں ان کی حالت خطرے سے باہر بیان کی جاتی ہے۔
فلسطین نیوز کو موصول ہونے والی اطلاعات کے مطابق ایک مقامی شہری نظام ابو رموز نے میڈیا کو بتایا کہ فلسطینی شہری نماز ظہر کی ادائیگی کے بعد ’باب الاسباط‘ کے قریب کھڑے تھے کہ صیہونی فوج نے ان کی مار پیٹ شروع کردی۔’قدس پریس‘ سے بات کرتے ہوئے ابو رموزنے کہا کہ اسرائیلی پولیس نے شہریوں کی شناخت پریڈ کی۔ انہیں گالم گلوچ کی اور بدکلامی کے بعد انہیں جسمانی تشدد کا بھی نشانہ بنایا۔
اسرائیلی پولیس نہتے فلسطینیوں کو تشدد کا نشانہ بنایا جس کے بعد خوف وہراس پھیل گیا۔ اسرائیلی پولیس نے نمازیوں کے سروں پر لاٹھیاں برسائیں جس کے نتیجے میں کئی نمازی لہو لہان ہوگئے۔ بعد ازاں متعدد فلسطینیوں کو حراست میں لینے کے بعد ’القشلہ‘ حراستی مرکز منتقل کردیا گیا۔