مقبوضہ بیت المقدس – (فلسطین نیوز۔مرکز اطلاعات) فلسطین کے مقبوضہ بیت المقدس میں قابض اسرائیلی فوج نے ایک فلسطینی دو شیزہ کوغیرانسانی اورتوہین آمیزسلوک کا نشانہ بنانے کے بعد حراست میں لے لیا۔
فلسطین نیوز کو موصول ہونے والی اطلاعات کے مطابق صیہونی فوج نے بیت المقدس میں راہ چلتے ایک فلسطینی لڑکی کا نقاب نوچ ڈالا، اسے سڑک پرگھسیٹا اور تشدد کا نشانہ بنانے کے بعد نامعلوم مقام پر منتقل کردیا گیا۔رپورٹ کے مطابق صیہونی فوج نے ایک بیس سالہ فلسطینی لڑکی اسیل ابو اللیل کو شاہراہ صلاح الدین پر روکا اور اس کا نقاب اتار پھینکا اور اسے توہین آمیز سلوک کا نشانہ بنانے کے بعد گرفتار کرلیا۔
نامہ نگار کا کہنا ہے کہ صیہونی فوج نے القدس میں نکالے گئے ایک احتجاجی جلوس پر بھی حملہ کیا اور جلوس میں شریک فلسطینیوں کو تشدد کا نشانہ بنایا۔ اسرائیلی فوج کے تشدد سے بارہ فلسطینی زخمی ہوئے ہیں۔ صیہونی فوج نے احتجاج کرنے والے متعدد فلسطینیوں کو حراست میں لے لیے۔