مقبوضہ بیت المقدس – (فلسطین نیوز۔مرکز اطلاعات) فلسطین کی وزارت خارجہ نے غرب اردن میں فلسطینیوں کی زمینوں پر قبضے کے بل کی منظوری کی مذمت کی ہے۔
فلسطینی وزارت خارجہ نے صیہونی کابینہ کی قانون ساز کمیٹی میں صیہونی کالونیوں کی تعمیر اور فلسطینیوں کی زمینوں پر قبضے اور اس کے الحاق کے بل پر تشویش کا اظہار کیا ہے اور کہا ہے کہ اس اقدام سے خود مختار فلسطینی مملکت کی تشکیل کی کوششیں ناکام ہوجائیں گی۔فلسطین کی وزارت خارجہ نے تاکید کے ساتھ کہا ہے کہ فلسطینیوں کی زمینوں پرصیہونی کالونیوں کی تعمیر اور بیت المقدس کو یہودیت کا رنگ دینے کے باعث صیہونیوں کے اندر غاصبانہ قبضہ جاری رکھنے کی ہمت بڑھی ہے۔
فلسطین کی وزارت خارجہ نے کہا کہ اقوام متحدہ کی سلامتی کونسل کو صیہونی حکومت کے دشمنانہ اقدامات کے سلسلے میں اپنی ذمہ داریوں پر عمل کرنا چاہئے۔
صیہونی حکومت کی کابینہ کی قانون ساز کمیٹی نے اتوار کو غرب اردن میں فلسطینیوں کی زمینوں پر قبضے کے نسل پرستانہ قانون کی منظوری دی ہے۔
انیس سو سڑسٹھ سے صیہونی حکومت کی جانب سے مقبوضہ زمینوں پر کالونیوں کی تعمیر کا سلسلہ جاری رہنا، غرب اردن اور غزہ پٹی میں خود مختار فلسطینی ملک کہ جس کا دارالحکومت بیت المقدس ہو، کی تشکیل کی راہ میں سب سے بڑی رکاوٹ ہے۔