فلسطینی منچلوں کی شراب نوشی اور ڈانس پارٹی پرعوام سراپا احتجاج

 

مقامی فلسطینی شہریوں کا کہنا ہے کہ اس طرح کی گھٹیا حرکات فلسطینی قوم کا خاصہ نہیں ہیں۔ قوم ایسی حیاباختہ حرکات کی کسی صورت میں اجازت نہیں دے سکتی ہے۔ فلسطینیوں کی پہچان ایک مجاھد قوم کی ہے، جس کا ماضی شراب نوشی اور ڈانس نہیں بلکہ شہداء کی قربانیوں اور غاصب دشمن کے خلاف جدو جہد آزادی سےعبارت ہے۔

 

مرکزاطلاعات فلسطین کے مطابق سماجی رابطے کی ویڈیو شیئرنگ ویب سائیٹ "یوٹیوب” پرتیزی سے پھیلنے والی اس فوٹیج پر فلسطینی شہریوں کی جانب سے تبصرے بھی کیے جا رہے ہیں۔ فلسطینی شہریوں کا کہنا ہے کہ البیرہ کے کسی ہوٹل میں اگر یہ واقعہ پیش آیا ہے تو ہم یقین نہیں کرسکتے کہ اس میں فلسطینی بھی ملوث ہوسکتے ہیں۔

 

ادھر اسرائیل کے عبرانی ریڈیونے بھی اپنی ایک رپورٹ میں اس شرمناک ویڈیو فوٹیج کی کوریج کی ہے۔ ریڈیو رپورٹ میں بتایا گیا ہے کہ یہ واقعہ رام اللہ میں البیرہ کے مقام پرایک ہوٹل میں چند ہی روز قبل پیش آیا تھا۔ اس تقریب میں یہودی رقصائیں اور فلسطینی لڑکے بانہوں میں بانہیں ڈال کر رقص کا شرمناک مظاہرہ کر رہے ہیں۔

 

یوٹیوب پر اس فوٹیج کو دیکھنے والے ایک شہری  علاء محمود نے کہا کہ "میں سمجھتا ہوں کہ صہیونیوں کے ساتھ رقص وسرود کی اس محفل میں شریک افراد فلسطینی نہیں ہوسکتے ہیں مجھے یہ یقین نہیں آرہا کہ فلسطینی بھی ایسی گھناؤنی حرکت کرسکتے ہیں”۔ کئی دوسرے شہریوں نے فلسطینی اتھارٹی سے مطالبہ کیا ہے کہ وہ صہیونیوں کے ساتھ شراب نوشی اور رقص کے مرتکب افراد کے خلاف سخت کارروائی کرے کیونکہ انہوں نےپوری قوم کی عزت پامال کی ہے۔