غزہ میں اختیارات کی منتقلی کے لیے تکنیکی کمیٹیوں کا قیام

غزہ – (فلسطین نیوز۔مرکز اطلاعات) فلسطین کی مخلوط قومی حکومت نے غزہ کی پٹی کے تمام محکموں کے انتظامات اور وزارتوں کے اختیارات متعلقہ محکموں کو سپرد کرنے کے لیے تکنیکی کمیٹیوں کا قیام عمل میں لانے کا فیصلہ کیا ہے۔

فلسطین نیوز کو موصول ہونے والی اطلاعات کے مطابق قومی حکومت کے ترجمان  طارق رشماوی نے ایک بیان میں بتایا کہ غزہ کی پٹی کے تمام محکموں کے اختیارات کی منتقلی کے لیے جامع منصوبہ تیار کیا گیا ہے۔

ترجمان کا کہنا ہے کہ حکومتی اختیارات، گذرگاہوں کا کنٹرول اور سیکیورٹی کے امور کے حوالے سے کمیٹیاں تشکیل دی گئی ہیں۔ یہ انتظامی اور تکنیکی کمیٹیاں غزہ کے تمام اداروں کے انتظامات قومی حکومت کو سپرد کرنے کے لیے طریقہ کار وضع کریں گی۔

خیال رہے کہ گذشتہ فلسطینی تنظیموں حماس اور فتح کے درمیان طے پائے مصالحتی معاہدے کے بعد غزہ کی پٹی کے تمام اختیارات اور انتظامی امور قومی حکومت کو سپرد کرنے کا فیصلہ کیا گیا تھا۔

حماس نے غزہ میں اپنی انتظامی کمیٹی تحلیل کردی ہے جس کے بعد یکم دسمبر تک غزہ میں تمام انتظامی اختیارات قومی حکومت کو سپرد کردیے جائیں گے۔