صیہونی آباد کاروں کا فلسطینی شہری اور اس کے بچوں پر وحشیانہ تشدد

نابلس (فلسطین نیوز۔مرکز اطلاعات) فلسطین کے مقبوضہ مغربی کنارے کے شمالی شہر نابلس میں صیہونی شرپسندوں کے ایک ڈنڈہ بردار گروپ نے ایک فلسطینی شہری اور اس کے بچوں پر تشدد کیا جس کے نتیجےمیں  فلسطینی اور اس کے بچے زخمی ہوگئے جب کہ ان کی کار کی بھی توڑپھوڑ کی گئی۔

فلسطین نیوز کو موصول ہونے والی اطلاعات کے مطابق مقامی فلسطینی ذرائع نے بتایا کہ طولکرم کے رہائشی منذر عبدالحیفظ موسیٰ اپنے بچوں کے ہمراہ نابلس سے اپنی کار پرگذر رہا تھا کہ صیہونی آباد کاروں نے اس پر سنگ باری شروع کردی۔ صیہونی آباد کاروں نے ’یتسھار‘ کالونی کے قریب حوارہ شاہراہ پر اس کی گاڑی روک دی اور اسے اس کے تین بچوں سمیت انہیں وحشیانہ تشدد کا نشانہ بنایا۔

ذرائع کا کہنا ہے کہ صیہونی آباد کار اچانک درختوں کےاندر سے باہر نکل آئے اور اندھا دھند پتھراؤ شروع کردیا۔ فلسطینی شہری نے صیہونی آباد کاروں کے وحشیانہ تشدد کے باوجود زخمی حالت میں گاڑی وہاں سے بھگا کر خود کو اور بچوں کو بچایا۔

بعد ازاں عبدالحفیظ موسیٰ اور اس کے بچوں کو نابلس کے رفیدیا اسپتال منتقل گیا جہاں ان کے زخموں کی مرہم پٹی کی گئی۔