الخلیل – (فلسطین نیوز۔مرکز اطلاعات) صہیونی فوج نے مشرقی الخلیل میں ایک فلسطینی گھر اور دکان پر دھاوا بول دیا۔
فلسطین نیوز کو موصول ہونے والی اطلاعات کے مطابق اسرائیلی فوج کی ایک بڑی تعداد نے حدور گاؤں پر دھاوا بول دیا اور ایک مقامی گھر اور ایک دکان میں داخل ہوگئے۔ قابض فوج نے اس چھاپے کے دوران ایک 19 سالہ نوجوان کو حراست میں لیا۔دریں اثناء اسرائیلی فوج نے الخلیل کی شہداء اسٹریٹ کے داخلی راستوں پر درجنوں افراد کو کئی گھنٹے کے لئے حراست میں لے لیا۔
مقامی کارکن عماد ابو شمسیہ کے مطابق اسرائیلی فوج نے شہداء اسٹریٹ اور تل رمیدہ کے مقامی باشندوں کو علاقے میں تین گھنٹوں تک حراست میں لئے رکھا اور انہیں اپنا نام اور فون نمبر رجسٹر کروانے پر مجبور کیا۔
اس کے علاوہ شہر بھر میں کئی عارضی ناکے بھی لگا دئیے گئے تھے۔ اسرائیل کی جانب سے پابندیوں کا یہ سلسلہ الخلیل کے شہریوں پر دباؤ ڈالنے کا ایک حربہ ہے۔ اسرائیلی حکام الخلیل سے ہونے والے مزاحمتی کارروائیوں پر خوفزدہ ہیں اور اپنے اس خوف کا اظہار مزید پابندیاں لگا کر کر رہے ہیں۔