مقبوضہ بیت المقدس – (فلسطین نیوز۔مرکز اطلاعات) اسرائیلی اخبارات کے مطابق صہیونی سیکیورٹی ادارے رواں ماہ ستمبر کے دوران فلسطینی مزاحمتی کارروائیوں میں اضافے کے خدشے سے پریشان ہیں۔
فلسطین نیوز کو موصول ہونے والی اطلاعات کے مطابق اسرائیلی فوج اور دیگر سیکیورٹی اداروں کو خدشہ ہے کہ مقبوضہ مغربی کنارے اور بیت المقدس میں رواں ماہ ستمبر میں فلسطینیوں کے عوامی احتجاج میں شدت آسکتی ہے۔رپورٹ کے مطابق اسرائیلی انٹیلی جنس اداروں کا کہنا ہے کہ ستمبر فلسطینیوں سے تعلقات کے حوالے سے زیادہ حساس مہینا ہے۔ اس ماہ میں اسرائیلی فوج، صہیونی آباد کاروں اور صہیونی ریاست کی تنصیبات پر حملوں میں غیرمعمولی اضافے کا امکام ہے۔
’ہارٹز‘ کے مطابق وسط جولائی کے بعد فلسطینی اتھارٹی کی پولیس دیگر اداروں نے اسرائیلی فوج کے ساتھ سیکیورٹی تعاون میں کمی کردی ہے۔ اس کمی کا بوجھ بھی اسرائیل ہی کو اٹھانا پڑ رہا ہے۔ فلسطینیوں کی مزاحمتی کارروائیوں بالخصوص فدائی حملوں کی روک تھام میں ناکامی اسرائیلی فوج کو پریشان کیے ہوئے ہے۔