دوسری جانب فلسطین کے سیاسی اور عوامی حلقوں کی طرف سے بان کی موت کے بیان کا خیرمقدم کیا گیا ہے۔ فلسطینی رہنماؤں کا کہنا ہے کہ بان کی مون کا بیان جرات مندانہ ہے مگر بات صرف بیان بازی تک محدود نہیں رہنی چاہیے بلکہ اقوام متحدہ فلسطین میں اسرائیلی توسیع پسندی اور غزہ کی پٹی کا محاصرہ اٹھانے کے لیے عملی اقدامات کرے۔
فلسطین نیوز کو موصول ہونے والی اطلاعات کے مطابق فلسطین پارلیمنٹ کے رکن اور غزہ کی ناکہ بندی اٹھانے کے لیے سرگرم کمیٹی کے چیئرمین جمال الخضری نے ایک بیان میں کہا ہے کہ جب بان کی مون خود یہ کہہ رہے ہیں کہ غزہ کی پٹی پر مسلط اسرائیلی پابندیاں خطرناک، غیراخلاقی اور ٹائم بم کی حیثیت رکھتی ہیں اور غرب اردن اور بیت المقدس میں یہودی آباد کاری عالمی قوانین کی کھلم کھلا خلاف ورزی ہے تو انہیں اسرائیل کو ان اقدامات سے روکنے کے لئے کس نے روک رکھا ہے۔ اقوام متحدہ کےسیکرٹری جنرل کا مقام و منصب صرف بیان بازی کے لیے نہیں بلکہ عملی اقدامات کا تقاضا کرتا ہے۔
جمال الخضری کا کہنا ہے کہ غزہ کی پٹی پرسنہ 2007ء سے معاشی پابندیاں عائد ہیں۔ ایک عشرے سے مسلط کی گئی معاشی پابندیوں کے نتیجے میں دو ملین افراد سنگین نوعیت کے مسائل کا سامنا کررہے ہیں۔ اس کے ساتھ ساتھ صہیونی ریاست کی طرف سے سنہ 2014ء میں غزہ کی پٹی پر مسلط کی گئی جنگ کے نتیجے میں ہزاروں مکانات مسمار کردیے گئے تھے۔ دو سال گذر جانے کے باوجود غزہ میں 9 ہزار رہائشی یونٹس کی تعمیر نہیں کی جاسکی ہے جس کے نتیجے میں اب بھی ہزاروں فلسطینی خاندان بے گھرہیں۔ غزہ پرپابندیوں کے نتیجے میں علاقے میں جنگ سے تباہ ہونے والے انفرااسٹرکچر کو بحال نہیں کیا جاسکا ہے۔