فلسطین نیوز کو موصول ہونے والی اطلاعات کے مطابق اسلامی جہاد کے سیاسی شعبے کے رکن نافذ عزام نے پریس کو بتایا کہ ان کی جماعت نے لوکل باڈیز الیکشن میں حصہ لینے کا حتمی فیصلہ نہیں کیا ہے تاہم جماعت کی قیادت اس حوالے گہری سوچ بچار کر رہی ہے۔
اسلامی جہاد کے رہنما کا کہنا تھا کہ بہتر ہے کہ تمام جماعتیں متفقہ طور پر بلدیاتی انتخابات میں حصہ لیں۔ انتخابی عمل کے حوالے سے فلسطینی سیاسی قوتوں میں انتشار ملک و قوم کے لیے نقصان دہ ہے۔
انہوں نے کہا کہ اسلامی جہاد نہیں چاہتی کہ فلسطینی قوتیں مزید تقسیم کا شکار ہوں۔ پہلے ہی سیاسی تعصب نے پورے عرب خطے کو اپنی لپیٹ میں لے رکھا ہے۔ فلسطین بھی اسی عرب خطے کا جزو ہے۔
خیال رہے کہ فلسطین میں بلدیاتی انتخابات کے انعقاد کے لیے 8اکتوبر 2016ء کی تاریخ مقرر کی گئی ہے۔ اسلامی تحریک مزاحمت ’حماس‘ نے بلدیاتی انتخابات میں حصہ لینے کا اعلان کیا ہے۔