فلسطین نیوز کو موصول ہونے والی اطلاعات کے مطابق اسرائیلی اخبارات میں شائع ہونے والی رپورٹس میں بتایا گیا ہے کہ حکومت نے وسطی علاقوں میں قائم کی گئی جیلوں کوخالی کرنے کے بعد انہیں سنہ 1948ء کے مقبوضہ شہر الجلیل اور جزیرہ نما النقب منتقل کرنے کا عمل شروع کرنے کا فیصلہ کیا ہے۔
عبرانی اخبار ’یدیعوت احرونوت‘ نے اپنی رپورٹ میں بتایا ہے کہ وسطی علاقوں سے جیلوں کی منتقلی کا مقصد ان کی جگہ پر ہزاروں کی تعداد میں صہیونیوں کے لیے مکانات تعمیر کرنا ہے۔
رپورٹ کے مطابق انتظامیہ جلد ہی ’غوش دان‘، ہشارون اور ساحلی علاقوں کی جیلوں کو اندرون فلسطین منتقل کرنے کا عمل شروع کرے گی۔
جیلوں کی وسطی علاقوں سے شمالی علاقوں کی طرف منتقلی کی مہم وزیر خزانہ موشے کحلون نے شروع کی ہے۔ موشے کحلون مقبوضہ فلسطینی علاقون کے لیے قائم کردہ اسرائیلی ’لینڈ اتھارٹی‘ کے بھی چیئرمین ہیں۔
وہ وسطی علاقوں میں قائم جیلوں اور ان کے لیے مختص رقبے پر صہیونی آباد کاروں کے لیے رہائشی کالونیاں بنانا چاہتے ہیں۔