مقبوضہ بیت المقدس – (فلسطین نیوز۔مرکز اطلاعات) اسرائیل کی مجسٹریٹ عدالت کی طرف سے رہا کیے گئے بیت المقدس کے چار باشندوں کو ان کے گھروں میں نظر بند کر دیا گیا ہے۔
فلسطین نیوز کو موصول ہونے والی اطلاعات کے مطابق صہیونی عدالت کے حکم پر چار فلسطینی شہریوں کی رہائی اس شرط پرعمل میں لائی گئی کہ وہ پانچ دن تک اپنے گھروں سے باہر نہیں نکلیں گے اور اگلے ایک ماہ تک کسی دوسرے شخص سے رابطہ نہیں کریں گے۔کلب برائے اسیران کی طرف سے جاری کردہ ایک بیان میں بتایا گیا ہے کہ اسرائیل کی مجسٹریٹ عدالت نے بیت المقدس کے چار شہریوں محمود عبدالطیف، محمد جابر، معتصم حجیج اور جہاد ناصر قوس کو رہائی کے بعد ان کے گھروں میں نظر بند رکھنے کا حکم دیا ہے۔
کلب برائے اسیران کے مندوب مفید الحاج کا کہنا ہے کہ مجسٹریٹ عدالت کی طرف سے چار فلسطینی شہریوں کو نہ صرف گھروں پر نظر بند رکھنے کا حکم دیا ہے بلکہ ان سے فی کس پانچ ہزار شیکل جرمانہ بھی وصول کیا گیا۔