رام اللہ – (فلسطین نیوز۔مرکز اطلاعات) فلسطین کے مقبوضہ مغربی کنارے کے وسطی شہر رام اللہ میں ہونے والے ایک فلمی میلے میں لبنان کے ایک متنازع پروڈیوسر زیاد الدویری کی تیار کردہ فلم ’قضیہ 23‘ کی نمائش پر پابندی عائد کی گئی ہے۔
فلسطین نیوز کو موصول ہونے والی اطلاعات کے مطابق اسرائیل نواز لبنانی پروڈیوسر زیاد الدویری کی تیار کردہ فلم کی فلسطین میں نمائش روکنے کے لیے عوامی اور سماجی سطح پر شدید احتجاج کیا گیا۔ عوام کے پرزور احتجاج بعد رام اللہ کی فلسطینی بلدیہ کے چیئرمین موسیٰ ابو حدید نے متنازع فلم دکھانے پر پابندی لگا دی ہے۔خیال رہے کہ زیاد الدویری کی فلم ’قضیہ 23‘ میں فلسطین کی تاریخ مسخ کرکے پیش کرنے کی مجرمانہ کوشش کی گئی ہے، جس پر فلسطینی عوامی اور سماجی حلقوں نے شدید احتجاج کیا ہے۔ سوشل میڈیا پربھی اس فلم کی نمائش روکنے کے لیے احتجاجی مہم چلائی گئی۔
خیال رہے کہ ’قضیہ 23‘ میں ایک شدت پسند عیسائی اور لبنان میں مقیم ایک فلسطینی پناہ گزین کے درمیان تنازع کی کہانی اس انداز میں بیان کی گئی ہے کہ وہ تنازع بالآخر ایک بڑی خانہ جنگی کا باعث بنتا ہے۔
متنازع لبنانی پروڈیوسر زیاد الدویری نے سنہ 2011ء اور 2012ء کے دوران ایک سال تک اسرائیل میں قیام کیا اور فلم ’الصدمہ‘ کی اسرائیل میں شوٹنگ کی تھی۔ الدویری پر صہیونی ریاست سے قریبی تعلقات رکھنے پر لبنانی اور فلسطینی سماجی اور عوامی حلقے شدید تنقید کا نشانہ بنا چکے ہیں۔