اسرائیل کے وزیر برائے سائنس وٹیکنالوجی نے اعتراف کیا ہے کہ ان کے ملک کےسائنسی تحقیقاتی پروگرام "افق 2020 ء” میں شرکت کے حوالے سے یورپی یونین کے ساتھ مذاکرات میں مشکلات کا سامنا ہے۔ یورپی یونین اس بات پرمصر ہے کہ اسرائیل نے سنہ 1967 ء کے مقبوضہ فلسطینی علاقوں میں اپنے ادارے قائم کر رکھے ہیں جوکہ متنازعہ ہیں، جس کے باعث اسرائیل کو اس سائنسی مشن میں شامل نہیں کیا جاسکتا ہے۔
مرکزاطلاعات فلسطین کے مطابق صہیونی وزیر یعقوب بیری نے اپنے ایک بیان میں بتایا کہ یورپی یونین اسرائیل کے صرف ان تعلیمی اور تحقیقاتی اداروں کو تسلیم کرتی ہے جو سنہ 1948 ء کے دوران اسرائیل کے قبضے میں آئے تھے، جن پراسرائیلی ریاست کی بنیاد رکھی گئی تھی۔ اس کے بعد سنہ 1967 ء کی چھ روزہ جنگ میں جن علاقوں کو قبضے میں لیا گیا ان میں اسرائیلی سرگرمیوں کو غیرقانونی سمجھا جاتا ہے۔
یورپی سائنسی تحقیقاتی پروگرام” افق 2020 ء” کی اہمیت کے بارے میں مسٹر یعقوب بیری نے کہا کہ یہ نہایت اہمیت کا حامل منصوبہ ہے جس میں صرف یورپی ملک ہی شامل ہیں۔ یورپ سے باہر صرف اسرائیل کواس میں شرکت کا موقع دیا جانا تھا مگر اسرائیل کی جانب سے مقبوضہ فلسطینی علاقوں بالخصوص مغربی کنارے اور بیت المقدس میں توسیعی پسندی کے باعث اسرائیل کو بھی محرومی کا سامنا ہے۔