فلسطین کے انٹرنیٹ ہیکرز پر مشتمل ایک گروپ نے ہفتہ 28 ستمبر کو دوسری تحریک انتفاضہ الاقصیٰ کی یاد میں اسرائیل پر سائبر حملوں کی دھمکی دی ہے۔ خود کو "آن لائن بریگیڈ” کے نام سے ظاہر کرنے والے ہیکرز کے گروپ کی جانب سے کہا گیا ہے کہ وہ یوم انتفاضہ الاقصٰی کی تیرہویں سالگرہ کے موقع پر اسرائیل پر سائبر حملے کریں گے۔
خیال رہے کہ فلسطین میں دوسری تحریک انتفاضہ اٹھائیس ستمبر سنہ 2000ء کو شروع ہوئی تھی، جسے اب تیرہ سال مکمل ہو چکے ہیں۔
آن لائن بریگیڈ کی جانب سے ایک با تصویر آڈیو ٹیپ منظر عام پر آئی ہے جس میں تنظیم کے کارکنوں نے دعویٰ کیا ہے کہ ان کے ساتھ اسلامی اور عرب دنیا کے سیکڑوں ہیکرز شامل ہیں۔ نیز یہ کہ وہ انتفاضہ الاقصیٰ کی تیرہویں سالگرہ کے موقع پر اپنے ہم وطن شہریوں کے خون اور ان کی شہادتوں کا بدلہ لیں گے۔ یہ بدلہ اسرائیل کی سرکاری ویب سائیٹ پر حملوں اور انہیں بلاک کرنے کی صورت میں لیا جائے گا۔
آڈیو ٹیپ میں کہا گیا ہے کہ آن لائن سائبر گروپ اٹھائیس ستمبر بروز ہفتہ کو یوم سیاہ کے طور پر منائے گی کیونکہ اسی روز آج سے تیرہ برس قبل فلسطینیوں نے مسجد اقصٰی کی آزادی کے لیے تحریک شروع کی تھی اور اسرائیلی فوج نے فلسطینیوں کی پرامن تحریک کچلنے کے لیے طاقت کا وحشیانہ استعمال کر کے سیکڑوں افراد کو شہید اور زخمی کردیا تھا۔
بشکریہ:مرکزاطلاعات فلسطین