(فلسطین نیوز۔مرکز اطلاعات) فلسطین کے سنہ 1948ء کے دوران اسرائیل کے قبضے میں آنے والے فلسطینی علاقوں کی نمائندہ مذہبی جماعت اسلامی تحریک نے خبردار کیا ہے کہ اسرائیل مقبوضہ فلسطینی علاقوں میں قائم تاریخی قبرستان "القسام” پر قبضے کی سازش کررہا ہے۔
اسلامی تحریک کی جانب سے جاری کردہ ایک بیان میں کہا گیا ہے کہ اسرائیل کی ایک تعمیراتی کمپنی نے پندرہ سال پرانے ایک بوسیدہ اور مبہم اسرائیلی فیصلے کی بنیاد پر دعویٰ کیا ہے کہ القسام قبرستان کی اراضی اس کمپنی کی ملکیت ہے اور یہاں فلسطینیوں نے غیر قانونی طور پر قبریں بنا رکھی ہیں۔بیان میں مزید کہا گیا ہے کہ اسرائیلی کمپنی نے ایک مقامی عدالت میں قبرستان پر قبضے کی راہ ہموار کرنے کے لیے درخواست دائر کی ہے۔ عدالت پرسوں اتوار کو درخواست کی سماعت کرے گی۔
اسلامی تحریک کا کہنا ہے کہ صہیونی حکام اور اسرائیلی کمپنی ایک سازش کے تحت القسام قبرستان کی اراضی غصب کرکے وہاں پر موجود فلسطینیوں کی قبریں اکھاڑ کران کی میتوں کی باقیات کو تلف کرنا چاہتی ہے۔ بیان میں فلسطینی شہریوں سے بھی اپیل کی گئی ہے کہ وہ اسرائیلی کمپنی کی سازش ناکام بنانے کے لیے اپنی صفوں میں اتحاد پیدا کریں اور قبرستان پرقبضے کی سازش کے خلاف کھل کر احتجاج کریں۔