سویڈن کی ایک تنظیم نے فلسطین میں انسانی حقوق کے لیے کام کرنے والے سماجی رہ نما کے لیے "متبادل امن نوبل” انعام کا اعلان کیا ہے۔
مرکزاطلاعات فلسطین کے مطابق سویڈش "رائٹس لیولی ھووڈ” کی جانب سے بتایا گیا ہےکہ انسانی حقوق گروپ” مرکز برائے انسانی حقوق فلسطین” کے ڈائریکٹر راجی الصورانی کو سالانہ متبادل نوبل انعام کے لیے منتخب کیا گیا ہے۔ فلسطینی سماجی رہ نما کو یہ انعام مشکلات میں گھرے فلسطینی علاقوں میں انسانی حقوق اور قانون کی بالادستی کے لیے ان کی خدمات کے اعتراف میں دینے کا فیصلہ کیا گیا ہے۔
سویڈن فاؤنڈیشن کی جانب سے فلسطینی سماجی کارکن راجی الصورانی کو "متبادل نوبل پرائز” دو دسمبر 2013 ء کو دیا جائے گا۔ تنظیم نے رواں سال کے نوبل انعامات کے لیے فلسطینی شہری کے علاوہ ایک امریکی پال ووکر ، کانگو کے ڈینس موکویچ اور سویڈن کے ھانز ہیرینز کو بھی منتخب کیا ہے۔ امریکی شہری پال ووکر کی دنیا کو کیمیائی ہتھیاروں سے پاک کرنے کی خدمات نوبل انعام کے اعزاز کا باعث بنی ہیں جبکہ کانگوین باشندے کے خواتین پر جنسی تشدد کے خلاف کامیاب مہمات چلانے کے اعزازمیں انعام دیا جائے گا۔
خیال رہے کہ تنظیم نے رواں سال کے "متبادل نوبل انعامات” کے لیے 48 ملکوں کے 94 افراد کی فہرست تیار کی تھی جن میں سے ان چار کو رواں سال کے "متبادل نوبل” انعامات کا حق دار قرار دیا گیا ہے۔
بشکریہ:مرکزاطلاعات فلسطین