فلسطینی حکومت نے بلغاریہ کا دورہ کرنے والے اپنے پارلیمانی وفد کے ہوٹل پر پولیس چھاپے اور انہیں فوری ملک چھوڑنے کا کہنے پر صوفیا سے شدید احتجاج کیا ہے۔ ادھر فلسطینی مجلس قانون ساز نے منتخب نمائندوں کے ساتھ بلغاریہ حکومت کے غیر سفارتی اور غیر سیاسی سلوک کی شدید مذمت کی ہے۔
فلسطینی حکومت کے ترجمان طاہر النونو نے ایک بیان میں بلغاریہ حکومت کے اس اقدام کی مذمت کرتے ہوئے کہا کہ اسے دیکھ کر صوفیا کے پالیسی سازوں پر صہیونی دباؤ کی شدت کا اندازہ لگایا جا سکتا ہے۔
مجلس قانون ساز کے ڈپٹی اسپیکر ڈاکٹر احمد بحر نے بھی چھاپے اور حماس کے وفد کو دورہ ادھورا چھوڑ کر بلغاریہ سے نکالنے کی مذمت کی ہے۔ جمعہ کے روز اپنے بیان میں ڈاکٹر احمد بحر نے کہا کہ جو کچھ ہوا اسے غیر ذمہ داری سیاسی حماقت کے سوا کچھ اور نہیں کہا جا سکتا۔ اسرائیلی دباؤ کے سامنے گھٹنے ٹیکنے کی یہ شرمناک مثال ہے۔ اس سے پوری فلسطینی قوم کی توہین کی گئی۔
بشکریہ:مرکز اطلاعات فلسطین