مرکزاطلاعات فلسطین کے مطابق رواں سال غزہ کی پٹی کا محاصرہ توڑنے کے لیے روانہ کیے گئے امدادی جہازوں کے اس قافلے کو”فریڈم فلوٹیلا 3 ” کا نام دیا گیا ہے۔
امدادی جہاز”ماریان” سویڈن سے چند روز چلاتھا جو ڈنمارک سے ہوتے ہوئے اتوار کی شام جرمنی کی بندرگاہ "کیل” پہنچا جہاں بڑی تعداد میں فلسطینی تارکین وطن اور انسانی حقوق کے مندوبین نے ماریان جہاز کے منتظمین کا استقبال کیا۔
جرمنی میں فلسطینی کلب کے چیئرمین فادی الطائش نے میڈیا سے گفتگو کرتے ہوئے کہا کہ ہم سب یہاں ماریاں امدادی جہاز کے استقبال کے لیے جمع ہوئے ہیں اور ہم فلسطینیوں کے ساتھ ہمدردی کرنے والوں اور غزہ کی پٹی کا محاصرہ توڑنے کا عزم رکھنے والے عالمی امدادی اداروں کی مساعی کا شکریہ کرتے ہیں کہ وہ طویل سفرکرکے فلسطینیوں کے ساتھ اظہار یکجہتی کرنا چاہتے ہیں۔
خیال رہے کہ مئی 2010 ء کو عالمی امدادی جہازوں کا ایک قافلہ امدادی سامان لے کر غزہ کی پٹی کے لیے روانہ ہوا تواسرائیلی فوجیوںنے کھلے سمندر میں ’’فریڈم فلوٹیلا‘‘ کو جارحیت کا نشانہ بنایا، جس کے نتیجے میں قافلے میں شامل ترکی "مرمرہ” بحری جہاز میں سوار نو ترک رضاکار شہید اور پچاس سے زاید کو زخمی کردیا گیا تھا۔ صہیونیوںنے امدادی سامان لوٹ لیا اور قافلے کے ہمراہ آنے والے 500 امدادی کارکنوں کو حراست میں لے لیا تھا۔
بشکریہ:مرکزاطلاعات فلسطین