(روز نامہ قدس ۔آنلائن خبر رساں ادارہ ) التلبانی 2021 میں غزہ پر ہونےوالی صہیونی جارحیت کے نتیجے میں شدید زخمی ہوگئے تھے ،جو گذشتہ روز خالق حقیقی سے جاملے۔
مقبوضہ فلسطین میں صہیونی ریاستی دہشتگردی کے خلاف برسرپیکار اسلامی مزاحمتی تحریک "حماس” نے اپنے عسکری ونگ القسام بریگیڈ کے رکن کی شہادت کا اعلان کرتے ہوئے بتایا ہے کہ محصور شہر غزہ کے وسطی علاقے دیر البلح سے تعلق رکھنے والے 32 سالہ محمد عودہ یوسف التلبانی جو 2021 میں غزہ پر ہونے والی اسرائیلی بمباری کے نتیجے میں شدید زخمی ہوگئے تھے گذشتہ روز زخموں کی تاب نا لاتے ہوئے شہید ہوگئے ہیں۔
بیان میں بتایا گیا کہ محمد عودہ یوسف’سیف القدس‘ معرکے میں اس وقت شدید زخمی ہوگئے تھے جب ان کےگھر پر اسرائیلی میزائل گرا تھا ، اس حملے میں ان کی بیوی اور بچی شہید ہوگئی تھیں ۔
واضح رہے کہ ’سیف القدس‘ کے نام سے شروع ہونے والی جنگ تھی جو غزہ میں فلسطینی مزاحمت اور اسرائیلی قابض دشمن کے درمیان 10 مئی 2021 کو القدس میں اسرائیلی حملوں کے بعد شروع ہوئی اور 21 مئی کو مصر کی ثالثی میں جنگ بندی کے ساتھ ختم ہوئی۔11 دنوں میں تقریباً 250 فلسطینی مارے گئے، جن میں 70 بچے اور 40 خواتین شامل ہیں، جب کہ 13 اسرائیلی ہلاک اور دیگر زخمی ہوئے۔