(روز نامہ قدس ۔آنلائن خبر رساں ادارہ) لبنان میں اسرائیلی فوج کو زمینی جارحیت مہنگی پڑگئی، حزب اللہ کے جانبازوں نے کم سے کم گیارہ صیہونی فوجیوں کو ہلاک اور متعدد کو زخمی کردیا۔
لبنانی میڈیا کی رپورٹ کے مطابق آج صبح غیر قانونی صیہونی افواج نے زمینی راستے سے لبنان کے جنوب میں نبیطیہ گورنری کے مرجایون ضلع کے قصبے "العدیسہ” میں دراندازی کی کوشش کی، اس دوران حزب اللہ کے جانبازوں نے پہلے سے تیار ایک گھات میں پھنسا کر کم سے کم گیارہ صیہونی فوجیوں کو جہنم واصل کر دیا اور متعدد کو زخمی کردیا۔
اسرائیل کی جانب سے غزہ اور اب لبنان میں بھی مزاحمتی تحریکوں کے ہاتھوں ہونے والے غیر معمولی نقصان کی تفصیلات جاری کرنے پر سخت سنسر شپ عائد ہے جس کے باعث صیہونی فوج کو ہونے والے نقصان کی صحیح تفصیلات منظر عام پر نہیں آرہی ہے تاہم آج ہونے والا حملہ اتنا بڑا اور شدید تھا کہ اسرائیلی فوج نے ٹوئٹر پر جاری بیان میں تصدیق کی ہے کہ جنوبی لبنان میں لڑائی کے دوران اسرائیلی فوج کے 3 کیپٹن سمیت 8 اہلکار ہلاک ہوگئے ہیں۔