مرکزاطلاعات فلسطین کے مطابق سرکاری اور غیر سرکاری سطح پر فلسطین میں آج یوم اسیران کے حوالے سے خصوصی تقریبات، جلسے جلوسوں اور ریلیوں کا بھی اہتمام کیا گیا ہے۔ ایک اندازے کے کے مطابق فلسطین میں یوم اسیران کے موقع پر 70 مقامی نشریاتی ادارے اور 20 علاقائی اور غیر ملکی نشریاتی ادارےاپنی خصوصی نشریات بھی پیش کریں گے۔ اندرون فلسطین دن بھر کی نشریات کا کچھ حصہ یوم اسیران کے حوالے سے ہونے والی سرگرمیوں کی کوریج کے لیے وقف ہوگا جبکہ عالمی نشریاتی ادارے فلسطینی وقت کے مطابق شام چار سے سات بجے تک اپنی نشریات فلسطینی قیدیوں کے ساتھ اظہار یکجہتی کے لیے منائیں گے۔
فلسطینی ٹی وی کی پروگرام پیش کار فاطمہ القاضی کا کہنا ہے کہ ٹیلی ویژن چینل کےتوسط سے فلسطینی اسیران کے حوالے سے خصوصی نشریات کا اہتمام کیا گیا ہے۔ اس حوالے سے آج کی نشریات میں نہ صرف قیدیوں کے ساتھ اظہار یکجہتی کے پروگرامات نشرکیے جائیں گے بلکہ فلسطینی مزاحمتی تنظیموں، اسلامی تحریک مزاحمت حماس، اسلامی جہاد، حماس کےعسکری ونگ القسام بریگیڈ کے ترجمان ابو عبیدہ کے بیانات بھی پیش کیے جائیں گے۔ اس کے علاوہ اسرائیلی جیلوں میں فلسطینی قیدیوں کو درپیش ہمہ نوع مظالم اور انہیں دی جانے والی طرح طرح کی غیرقانونی سزائوں پر بھی تفصیل سے روشنی ڈالی جائے گی۔ کم عمر فلسطینیوں کو جیلوں میں ڈالنے اور شہریوں کو گرفتار کرنے سے متعلق عالمی قوانین کو بھی ڈسکس کیا جائے گا۔
بشکریہ:مرکزاطلاعات فلسطین