بیت المقدس میں 85مکان اور 1500 کمروں کا ریستوران بنانے کا اسرائیلی منصوبہ

اسرائیل کی وزارت ہائوسنگ و منصوبہ بندی نے بیت المقدس اور مغربی کنارے میں نئے توسیعی اور تعمیراتی منصوبوں کی منظوری دی ہے۔ اس منصوبے کے تحت رام اللہ میں ’’غفات زئیف‘‘ یہودی کالونی میں توسیع کرتے ہوئے مزید 85 مکانات کی تعمیر اور 1500 کمروں پر مشتمل ایک بڑا ریستوران بنانے کی اسکیم شامل ہے۔ اس کے علاوہ جبل المکبر میں 10 دونم کا ایک پلاٹ بھی اسی قسم کی تعمیراتی اسکیموں کے لیے مختص کیا گیا ہے۔

مرکزاطلاعات فلسطین کے مطابق اسرائیل کی انسانی حقوق کی تنظیم’’نائو پیس‘‘ کی جانب سے جاری ایک بیان میں بتایا گیا ہے کہ وزارت ہائوسنگ نے یہودی کالونی میں توسیع کے لیے مزید 85 مکانات کی تعمیر کا خاکہ جاری کیا ہے۔ یہ مکانات مغربی کنارے کے وسطی شہر رام اللہ میں تعمیر کیے جائیں گے جن کی تعمیرات کے لیے جلد ہی ٹینڈر جاری کیے جا رہے ہیں۔

دوسری جانب تنظیم آزادی فلسطین کی ایگزیکٹو کمیٹی کے رکن اور القدس امور کے چیئرمین احمد قریع نے اپنے ایک بیان میں بیت المقدس اور مغربی کنارے میں نئی صہیونی توسیع پسندی کی شدید مذمت کی ہے۔ اپنے ایک بیان میں احمد قریع کا کہنا ہے کہ یہودی آباد کاری کے تازہ منصوبوں کا کوئی مستقبل نہیں اور نہ ہی وہ حقیقی طورپر قائم ہونے چاہئیں۔

انہوں نے کہا کہ یہودی توسیع پسندی کی صہیونی سرگرمیاں عالمی قوانین کی سنگین خلاف ورزی ہیں۔

بشکریہ:مرکزاطلاعات فلسطین