مرکزاطلاعات فلسطین کے مطابق گذشتہ ایک ہفتے کے دوران صہیونی فوج نے مقبوضہ مغربی کنارے سے بیرونی ملک سفر کرنے والے 512 فلسطینیوں کو سفر سے روک دیا۔ روکے گئے فلسطینیوں میں طلباء، کاروباری شخصیات، مریض اور ان کے اہل خانہ شامل ہیں۔
اس سے پچھلے ہفتے کے دوران صہیونی بارڈر حکام نے مغربی کنارے سے الکرامہ گذرگاہ کے راستے اردن جانے والے 560 فلسطینیوں کو روک دیا تھا۔ فلسطینی شہریوں کی بیرون ملک سفر پر تازہ پابندیاں دو ہفتے قبل مغربی کنارے سے تین یہودی لڑکوں کی گم شدگی کے بعد لگائی گئی ہیں۔ گذشتہ ہفتے الکرامہ گذرگاہ سے 19 ہزار 131 فلسطینی بیرون ملک سفرپر گئے جبکہ 24 ہزار 264 بیرون ملک سے فلسطین آئے۔
الکرامہ گذرگاہ کے حکام کا کہنا ہے کہ سیکیورٹی وجوہات کی بناء پر پانچ سو بارہ فلسطینیوں کو بیرون ملک سفرسے روکا گیا۔ ذرائع کے مطابق بیرون ملک سفر سے روکے گئے تمام افراد کی عمریں50 سال سے کم تھیں۔ انہیں روکے جانے کی بنیادی وجہ ان پر ممکنہ طور پر یہودی آباد کاروں کے اغواء میں ملوث ہونے کا شبہ بتایا گیا ہے۔
بشکریہ:مرکزاطلاعات فلسطین