رپورٹ کے مطابق پچھلے ماہ جنوری میں صہیونی فوج کے ہاتھوں مغربی کنارے اور بیت المقدس میں صحافتی حقوق کی 45 بار پامالیاں کی گئیں۔
فلسطین ریڈیو اینڈ ٹیلی ویژن یونین کی جانب سے جاری کردہ اعدادو شمار میں بتایا گیا ہے سنہ 2016 ء کا آغاز صہیونی فوج کے ہاتھوں ذرائع ابلاغ کے حقوق کی سنگین پامالیوں سے ہوا ہے۔ پچھلے ایک ماہ میں پینتالیس بار صحافتی حقوق کی خلاف ورزیاں کی گئیں۔ ان میں فیلڈ میں مظاہروں کی کوریج کرنے والے صحافیوں پر تشدد، ان کے کیمروں اور دیگر سامان کی توڑپھوڑ، صحافیوں کی گرفتاریاں اور انہیں دی جانے والی قید کی سزائیں شامل ہیں۔
رپورٹ میں بتایا گیا ہےکہ جنوری 2016 ء میں اسرائیل کی فوجی عدالتوں کی جانب سے تین صحافیوں کو انتظامی حراست کی سزائیں دی گئیں۔ فلسطین الیوم ٹی وی کے نامہ نگار مجاھد السعدی سمیت 10 صحافیوں کو حراست میں لیا گیا۔ تین صحافیوں کی مدت حراست میں توسیع کی گئی۔ فلسطین سے نشریات پیش کرنے والے ٹی وی چینلوں، اخبارات اور ریڈیو کے دفاتر پرچھاپے مار کروہاں توڑپھوڑ کی گئی اور عملے کو زدو کوب کیا گیا۔
رپورٹ کے مطابق جنوری میں فلسطین میں ہفتہ وار فلسطینیوں کے احتجاجی مظاہروں کی 9 بار کوریج پرپابندی لگائی گئی۔ اس دوران دو صحافیوں انال الجدع اور خاتون نامہ نگار صفیہ عمر کو تشدد کے بعد حراست میں لیا گیا۔