رپورٹ کے مطابق اسرائیلی پولیس کی جانب سے جاری کردہ بیانات میں بتایا گیا ہے کہ باب العامود کےمقام پر تین فلسطینی لڑکوں نے فائرنگ اور چاقو سے خواتین فوجی اہلکاروں پر حملے کیے۔ جس کے نتیجے میں ایک خاتون رنگ روٹ ہلاک اور اس کی تین ساتھی زخمی ہوگئیں جن سے دو کی حالت خطرے میں بیان کی جاتی ہے۔ صہیونی فوج کی جوابی فائرنگ میں تینوں حملہ آور بھی شہید ہوگئے۔
اسرائیلی فوج کی جانب سے جاری کردہ بیان میں بتایا گیا ہے کہ فلسطینیوں کے حملے میں 19 سالہ فوجی اہلکارخاتون ’ھدار کوھین‘ ہلاک ہوگئی۔ اس کا تعلق تل ابیب کی ’’اوریہودا‘‘کالونی سے ہے۔
فلسطینی وزارت صحت کی جانب سے جاری کردہ بیان فدائی حملے میں شہید ہونے والے تین فلسطینیوں کی شناخت بھی جاری کی گئی ہے۔ تینوں شہداء کا تعلق مغربی کنارے کے شمالی شہر جنین کے قباطیہ قصبے سے ہے۔
باب العامود کارروائی میں شہید ہونے والے نوجوانوں کی شناخت 21 سالہ احمد ناجح ابو الرب، 20 سالہ محمد احمد کمیل اور 22 سالہ احمد ناجح اسماعیل کے ناموں سے کی گئی ہے۔
رپورٹ کے مطابق باب العامود کارروائی کے بعد اسرائیلی فوج نے شہید ہونے والے فلسطینیوں کے آبائی علاقے قباطیہ کا محاصرہ کرلیا ہے۔ ادھر بیت المقدس میں بھی صہیونی ریاست کے خلاف احتجاجی مظاہرے ہوئے ہیں جنہیں منتشر کرنے کے لیے قابض فوج نے آنسوگیس کی شیلنگ کی ہے۔