عبرانی نیوز ویب سائیٹ’’وللا‘‘ کی جانب سے مرتب کی گئی ایک رپورٹ میں بتایا گیا ہے کہ پچھلے سال کے شروع سے اب تک مجموعی طورپر 995 مزاحمت کارروائیاں کی گئی ہیں۔۔ ان میں سے 823 کارروائیاں پچھلے سال کی گئی جب کہ 172 کارروائیاں رواں سال کے دوران کی گئی ہیں۔ رپورٹ میں بتایا گیا ہے کہ زیادہ تر مزاحمتی کارروائیاں بیت المقدس اور مقبوضہ مغربی کنارے میں کی گئیں۔ ان میں اسرائیلی فوجیوں پر فائرنگ ، تیز دھار آلات سے حملوں اور گاڑیوں کے ٹکر مار کرانہیں کچلنے جیسے کارروائیاں شامل ہیں۔
رپورٹ میں بتایا گیا ہے کہ پچھلے سال کے آغاز سے اب تک اسرائیلی پولیس اور فوج پر فلسطینی مزاحمت کاروں کی جانب سے 814 پٹرول بم حملے کیے گئے۔ 142 بارودی سرنگ کارروائیاں کی گئیں۔ سولہ نار فائرنگ کےواقعات پیش آئے۔ رواں سال فائرنگ کا ایک واقعہ رونما ہوا ہے۔
رپورٹ میں کہا گیا ہے کہ رواں سال کے دوران اسرائیلیوں پر چاقو سے حملوں کے واقعات میں غیرمعمولی اضافہ ہوا ہے۔ رواں سال کے چار ماہ میں ایسے چار واقعات پیش آچکے ہیں جبکہ پچھلے سال صرف تین واقعات پیش آئے تھے۔
گاڑیوں کے ذریعے صہیونیوں کو کچلنے کے مجموعی طورپر 15 واقعات پیش آئے۔ ان میں سے 11 واقعات پچھلے سال اور چار واقعات رواں سال پیش آچکے ہیں۔ ان واقعات میں ایک اسرائیلی پولیس اہلکار ہلاک اور کئی زخمی ہوئے ہیں۔
بشکریہ:مرکزاطلاعات فلسطین