فلسطین کے مقبوضہ مغربی کنارے اور اردن سے متصل وادی اردن میں اسرائیلی فوج نے فلسطینی شہریوں کے مکانات کی مسماری کی
ایک تازہ کارروائی میں کم سے کم 20 مختلف عمارتیں مسمار کردیں۔ منہدم کی گئی عمارتوں میں فلسطینیوں کے رہائیشی فلیٹس، شیلٹر اور مویشیوں کے باڑے بھی شامل ہیں۔
مرکز اطلاعات فلسطین کے مطابق صہیونی فوج نے بدھ کے روز شمالی وادی اردن میں جفتلک کے مقام پر فلسطینیوں کے مکانات کی مسماری کا ایک نیا آپریشن شروع کیا، جس میں بیس عمارتوں کو مسمار کردیا گیا۔
مقامی فلسطینی شہری عدنان دعیس نے پی آئی سی کے نمائندے کو بتایا کہ جفتلک بستی میں اس کے زیراستعمال مویشیوں کے پانچ باڑے اور رہائیشی مقاصد کے لیے بنائے گئے ایک درجن کے قریب شیلٹرز مسمار کردیے۔ اسرائیلی فوجیوں کا کہنا تھا کہ فلسطینی باشندوں نے یہ مکانات حکومت کی اجازت کے بغیر تعمیر کر رکھے ہیں، جس پر ان کی مسماری ناگزیر ہے۔
ادھر وادی اردن میں فلسطینی میونسپل کمیٹی کے چیئرمین عارف دراغمہ نے بتایا کہ صہیونی فوج نے انہدامی کارروائیوں میں چھ مکانات اور مویشیوں کے لیے بنائے گئے 12 باڑے مسمار کردیے۔ انہوں نے کہا کہ مسمار کی گئی عمارتیں چار سگے بھائیوں عمر، عمران، شحدہ اور عدنان دعیس کی ملکیت تھیں۔ مکانات مسماری سے کم سے پچاس افراد بے گھر ہوگئے ہیں۔
بشکریہ:مرکزاطلاعات فلسطین