مصری حکومت نے جیلوں میں ڈالے گئے 18 فلسطینی شہریوں کو رہا کردیا ہے۔ رہائی پانے والے تمام افراد فلسطین کے علاقے غزہ کی پٹی سے تعلق رکھتے ہیں۔ رہائی کے بعد تمام فلسطینی رفح بارڈر کے راستے غزہ پہنچ گئے ہیں۔
مصری سیکیورٹی ذرائع نے بتایا کہ غزہ کی پٹی پر اسرائیلی حملے کے دوران سرحد پار کرنے والے اٹھارہ فلسطینیوں کو گرفتار کر لیا گیا تھا اور انہیں دوبارہ رہا کر دیا گیا ہے اور وہ غزہ کی پٹی کے لیے روانہ ہوگئے ہیں۔
مصری سیکیورٹی ذرائع کا کہنا ہے کہ انہوں نے رہا کیے گئے ڈیڑھ درجن فلسطینی ان کے سامان کے ہمراہ فلسطینی بارڈر حکام کے حوالے کردیے تھے۔ انہوں نے چھان بین کے بعد رہائی پانے والوں کو اپنے گھروں کو جانے کی اجازت دے دی ہے۔
مصری حکام کا کہنا ہے کہ فلسطینی شہریوں کو مصر میں غیرقانونی طریقے سے داخل ہونے کے الزام میں گرفتار کیا گیا تھا۔ مصر میں داخلے کے وقت ان کے پاس کسی قسم کے کاغذات نہیں تھے۔
سیکیورٹی حکام نے خدشہ ظاہر کیا ہے کہ مصر میں غیرقانونی طور پر داخل ہونے والے فلسطینی ساحلی شہر اسکندریہ سے سمندر کے راستے یورپ اور دوسرے ممالک جانا چاہتے تھے۔ ان تمام افراد کو اسکندریہ ہی سے حراست میں لیا گیا تھا۔
خیال رہے کہ اسی ماہ کے وسط میں مالٹا کے قریب سمندر میں ایک مسافر کشتی کے حادثے میں کم سے کم چار سو فلسطینی باشندے ڈوب گئے تھے۔ انہیں مبینہ طور پر مصری اسمگلروں نے کشتی میں سوار کیا تھا اور وہ انہیں یونان اور دوسرے ملکوں کی طرف اسمگل کرنا چاہتے تھے۔
بشکریہ:مرکزاطلاعات فلسطین