غرب اردن (فلسطین نیوز۔مرکز اطلاعات) صہیونی فوج نے آج بدھ کو مقبوضہ مغربی کنارے کے مختلف شہروں میں گھر گھر لوٹ مار کی مہم کے دوران شہریوں کو بڑی مقدار میں نقدی اور زیورات سے محروم کرنے کے ساتھ ساتھ کم سے کم 16 فلسطینیوں کو حراست میں لے لیا۔
فلسطین نیوز کو موصول ہونے والی اطلاعات کے مطابق غرب اردن کے مختلف شہروں سے مقامی ذرائع نے بتایا کہ اسرائیلی فوج نے غرب اردن میں بدھ کو علی الصباح چھاپہ مار کارروائیوں کا سلسلہ شروع کیا۔ غرب اردن کے وسطی شہر رام اللہ میں بیتونیا، کفر مالک اور طولکرم میں دیر الغصون کے مقامات پر فلسطینی شہریوں اور اسرائیلی فوج کے درمیان تصادم کی بھی اطلاعات ہیں۔رپورٹ کے مطابق اسرائیلی فوج نے گھروں میں تلاشی کی آڑ میں نقدی اور زیورات لوٹ لیے اور قیمتی سامان کی توڑپھوڑ کی۔
نابلس میں تلاشی کے دوران ایک وکیل اور یونیورسٹی کے ایک پروفیسر سمیت تین فلسطینیوں کو حراست میں لیا گیا۔
مقامی ذرائع کا کہنا ہے کہ نابلس میں المعاجین کالونی پر اسرائیلی فوج نے چھاپے کے دوران یونیورسٹی کے لیکچرار غسان ذوقان کے گھر پر دھاو بولا اور گر میں موجود 11 ہزار شیکل کی نقد رقم۔ ایک موبائل فون اور ایک لیپ ٹاپ کمپیوٹر قبضے میں لے لیا۔
ادھر اسرائیلی فوج نے جنوبی نابلس میں کفر قلیل کے مقام پر سابق اسیر اور قانون دان ابراہیم نواف العامر کوحراست میں لے لیا۔ اسرائیلی فوج نے جنوب مشرقی قصبے قصرہ سے محمد ولید عبدالقادرنامی ایک نوجوان کو حراست مین لے کرنامعلوم مقام پر منتقل کردیا۔
جنین شہر میں خروبہ کالونی میں تلاشی کے دوران اسرائیلی فوج نے لوٹ مارکی اور سابق اسیر احمد عبداللہ ابو سریہ کو نقد رقم اور موبائل فون سے محروم کردیا۔
دیگر شہروں میں گھر گھر تلاشی کے دورانÂ اسید یاسر سلیم، صبحی ابو شوشہ، جواد محمود طقاطقہ، شاھر عیسیٰ طقاطقہ، راید شریف ابو ماریا، ایھم خلیل صبارنہ، خلیل جمال ابو ماریا، عمار جمال ابو ماریا، ایاد عمر الصلیبی، زیاد عمر الصلیبی، حسن محمد مقبل، جہاد راید مقبول اور احمد سمیر ابو عیاش کو حراست میں لینے کے بعد نامعلوم مقام پر منتقل کردیا۔