الاقصی وقف فاؤنڈیشن نے ایک حالیہ بیان میں مسجد اقصی کے خلاف بڑھتے ہوئے اسرائیل اقدامات کے بارے میں خبردار کیا ہے۔ فاؤنڈیشن نے امت مسلہ پر زور دیا کہ قبلہ اول کا تقدس برقرار رکھنے کے لئے مناسب اقدامات کئے جائیں۔
الاقصی فاونڈیشن سے بات کرتے ہوئے مسجدِ الاقصی کے نمازی اور ایک عینی شاہد نے بتایا کہ اسرائیلی فوج کی 100 باوردی خواتین اہلکار گزشتہ روز مسجد الاقصی میں زبردستی داخل ہوئیں۔ عینی شاہدین کے مطابق خواتین فوجی اہلکاروں کی مسجد میں نقل و حرکت دیکھ کر ایسا لگتا تھا کہ وہ فوجی پریڈ کرنے اس مقدس مقام میں داخل ہوئی ہیں۔
الاقصی فاؤنڈیشن نے ایک بیان میں بتایا کہ اسرائیلی فوجیوں اور یہودی آبادکاروں کے مسجد میں حالیہ داخلے سے یہ بات سامنے آئی ہے کہ ان کے مسجد میں زبردستی داخلے کے واقعات میں اضافہ ہوتا جا رہا ہے۔
تنظیم نے اہالیاں بیت المقدس اور مقبوضہ علاقے کے فلسطینیوں سے اپیل کی ہے کہ وہ مسجد اقصی جوق در جوق آئیں۔ نیز مسلم امت مسجد اقصی کو تمام خطرات سے محفوظ بنانے کے لئے فوری اقدامات اٹھائے۔
بشکریہ:مرکز اطلاعات فلسطین