فلسطین کے مقبوضہ مغربی کنارے کی مختلف یہودی کالونیوں میں غیرقانونی طور پر آباد کیے گئے یہودیوں کی تعداد تین لاکھ 82 ہزار سے تجاوز کرگئی ہے۔ اسرائیلی میڈیا کی رپورٹس میں بتایا گیا ہے کہ رواں سال کی پہلی ششماہی کے دوران مزید 7500 یہودی آباد کاروں کو مغربی کنارے میں آباد کیا گیا ہے۔ آباد کاری کا یہ سلسلہ اعلانیہ اور خفیہ دونوں انداز میں عمل میں لایا جاتا رہا ہے۔
مرکز اطلاعات فلسطین کے مطابق "یچا” کونسل نامی ایک اسرائیلی ادارے کی جانب سے مغربی کنارے میں یہودی آباد کارں کی تعداد کی تفصیلات جاری کی گئی ہیں۔ رپورٹ میں بتایا گیا ہے کہ رواں سال کے آغاز میں مغربی کنارے میں یہودی آباد کاروں کی تعداد تین لاکھ 74 ہزار 50 تھی جو کہ اب نو ماہ بعد ایک اعشاریہ نو فی صد اضافے کے ساتھ تین لاکھ 82 ہزار سے تجاوز کرگئی ہے۔
رپورٹ کے مطابق مغربی کنارے میں "بیتار ایلیت” نامی یہودی کالونی آبادکارں کی تعداد کے حوالے سے سب سے بڑی کالونی ہے جس میں 63 ہزار یہودی آباد کار آباد ہیں۔