مقبوضہ بیت المقدس میں جہاں یہودی آباد کاری کے منصوبے تیزی سے جاری ہیں وہیں اسرائیلی کھدائیوں کے سبب شہریوں کو بھی طرح طرح کی مشکلات کا سامنا کرنا پڑ رہا ہے۔
مقدس شہر کے سلوان ٹاؤن میں انہیں کھدائیوں کے سبب لینڈ سلائیڈنگ شروع ہو گئی جس سے وادی حلوہ کی مرکزی شاہراہ بند ہو کر رہ گئی ہے۔ گزشتہ روز شام کے وقت ہونے والی اس سلائیڈنگ کے بعد عیر ڈیوڈ یہودی بستی کے آباد کاروں نے راستے میں پڑنے والے شگاف کو کنکریٹ سے بند کردیا۔
وادی حلوہ مطالعاتی مرکز نے بتایا کہ جس جگہ سلائیڈنگ ہوئی یہ وہی مقام ہے جس کے قریب صرف یہودیوں اور سیاحوں کے پیدل چلنے کے لیے ایک زیر زمین سرنگ بنائی گئی ہے۔یہ سرنگ یہودی بستی ”شہر داؤد” اور وادی حلوہ کے علاقے ”موقف جفعاتی” کو آپس میں ملاتی ہے۔
مرکز نے پہلے ہی زیر زمین سرنگوں کے اس منصوبے پر خبردار کرتے ہوئے لینڈ سلائیڈنگ کے خطرات سے آگاہ کیا تھا ۔ سرنگ یہودی تنظیم ” العاد” کی جانب سے بنائی گئی ہے۔ خیال رہے کہ گزشتہ دو روز کے دوران وادی حلوہ کی مرکزی شاہراہ کے متعدد مقامات پر لینڈ سلائیڈنگ ہوئی اور جگہ جگہ سڑک میں شگاف بھی پڑ گئے ہیں۔ یہ سلسلہ سردیوں کے آغاز سے جاری ہے۔ اس سب کے باوجود یہودی بلدیہ نے ہونے والے نقصان کے تدارک کے لیے اب تک کوئی اقدامات نہیں اٹھائے۔
بشکریہ:مرکز اطلاعات فلسطین