(فلسطین نیوز۔مرکز اطلاعات) فلسطین کے مقبوضہ مغربی کنارے کے شہر بیت لحم میں حوسان کے مقام پر ایک یہودی آباد کار نے رات گئے ایک پانچ سالہ فلسطینی بچے کو اپنی گاڑی کی ٹکر مار کر کچل ڈالا، جس کے نتیجے میں بچہ شدید زخمی ہوا ہے۔
فلسطین نیوز کو موصول ہونے والی اطلاعات کے مطابق گاڑی کی ٹکر سے زخمی بچے کی شناخت آدم حمامرہ کے نام سے کے گئی ہے۔ اسے یہودی آباد کار نے سڑک کے کنارے اس وقت گاڑی کی ٹکر مار دی جب وہ وہاں کھیل رہا تھا۔ یہودی آباد کار بچے کو کچلنے کے بعد جائے وقوعہ سے فرار ہوگیا۔ مقامی شہریوں نے بچے کو اٹھا کر مقامی اسپتال پہنچایا جہاں اس کی حالت اب خطرے سے باہر بیان کی جاتی ہے۔اطلاعات کے مطابق یہودی آباد کار نے بعد ازاں خود کو اسرائیلی پولیس کے حوالے کردیا جنہوں نے اسے ’’عتصیون‘‘ پولیس سینٹر منتقل کردیا ہے تاہم اس کے خلاف کسی قسم کی قانونی کارروائی کی اطلاع نہیں مل سکی۔
زخمی بچے کو العربیہ آرگنائزیشن اسپتال منتقل کیا گیا ہے جہاں اس کی حالت اب خطرے سے باہر بتائی جاتی ہے۔ اسپتال ذرائع کے مطابق بچے کی گردن میں چوٹیں آئی ہیں۔