(فلسطین نیوز۔مرکز اطلاعات) فلسطین کے مقبوضہ فلسطینی شہر الناصرہ میں یہودی انتہا پسندوں نے ایک مقامی فلسطینی مسیحی قبرستان ’’اللاتین‘‘ پر یلغار کرکے قبرستان میں موجود کئی قبروں کی بے حرمتی کی اور تین قبروں کے نشانات تک مٹا ڈالے۔ اس موقع پر یہودی انتہا پسندوں نے انگریزی زبان میں قبروں پر مسلمانوں، اسلام ، عیسائیوں اور فلسطینیوں کے خلاف اشتعال انگیزی نعرے بھی تحریر کیے۔
رپورٹ کے مطابق اسرائیلی پولیس کی جانب سے جاری کردہ ایک بیان میں کہا گیا ہے کہ انہیں الناصرہ شہر میں عیسائیوں کے ایک قبرستان کی بے حرمتی اور تین قبروں کی توڑپھوڑ کی اطلاعات ملی ہیں۔ وہ اس واقعے کی چھان بین کررہے ہیں۔
خیال رہے کہ فلسطین میں اس نوعیت کے بیشتر واقعات میں ’’تدفیع الثمن‘‘ نامی ایک انتہا پسند یہودی گروپ کے ملوث ہونے کی تصدیق کی جا چکی ہےمگر صہیونی حکومت قصدا انتہا پسند یہودیوں کے اس گروپ کے حوالے سے غفلت کامظاہرہ کررہی ہے۔ پچھلے کچھ عرصے کے دوران عیسائیوں کے مقدس مقامات ’’رقاد السیدہ العذراء‘‘ بیت جمال قبرستان اور کئی دوسرے مقدس مذہبی مقامات پر تدفیع الثمن نامی گروپ کی جانب سے حملے کئے جاتے رہے ہیں۔