اسلامی تحریک مزاحمت "حماس” کے سیاسی شعبے کے نائب صدر اور سابق وزیراعظم اسماعیل ھنیہ نے کہا ہے کہ ان کی جماعت چاہے اقتدار میں ہو یا نہ ہو تعمیر انسانیت، وطن کی آزادی، ایمان اور جہاد اس کے اہم ترین مقاصد اور اہداف ہیں۔
مرکز اطلاعات فلسطین کے مطابق ان خیالات کا اظہار انہوں نے غزہ کی پٹی میں ایک تقریب سے خطاب میں کیا۔ انہوں نے کہا کہ حماس کا قیام فلسطینیوں کے حقوق اور مطالبات کی بنیاد پر عمل میں لایا گیا۔ فلسطین کی آزادی، اسرائیلی جیلوں میں قید وطن عزیز کے بہادر سپوتوں کی رہائی، فلسطین سے نکالے گئے لاکھوں باشندوں کی آباد کاری اور بیت المقدس کو فلسطین کا ابدی دارالحکومت بنائے جانے تک ہماری جدو جہد جاری رہے گی۔سابق وزیراعظم کا کہنا تھا کہ فلسطینیوں کی نئی نسل آزادی کے لیے زیادہ پختگی اور عزم کا مظاہرہ کررہی ہے اور وہ بیت المقدس سمیت ارض وطن کے چپے چپے کی آزادی اور فلسطینی پناہ گزینوں کی دوبارہ آباد کاری کی صلاحیت رکھتی ہے۔