اسرائیلی فوج نے ماہ صیام کی حرمت اور اس کے تقدس کو پامال کرتے ہوئے فلسطینی اسیران پر تشدد روز کا معمول بنا رکھا ہے۔ اطلاعات کے مطابق صحرائے نقب کی جیل میں اسرائیلی فوجیوں نے اسیران پر اس وقت حملہ کیا جب نماز تراویح ادا کر رہے تھے۔
مرکز اطلاعات فلسطین کے مطابق انسانی حقوق کی تنظیم کلب برائے اسیران کے سیکرٹری جنرل راغب ابو دیا کہ گذشتہ روز جزیرہ نما نقب کی سینٹرل جیل میں اسرائیلی فوجیوں اور جیلروں نے مل کر قیدیوں کے خلاف سرچ آپریشن شروع کیا۔ کئی قیدی اس وقت نماز تراویح میں مصروف تھے۔ یہودی غنڈہ گرد اسیران کی بیرکوں میں داخل ہوتے اور ان کا سامان اٹھا کر باہر پھینکتے جاتے۔ اس دوران نماز میں مصروف اسیران کو بھی گھسیٹ کر سڑکوں پر لایا گیا۔
ابو دیاک نے صہیونی فوجیوں کی قیدیوں پر جارحیت کو شرمناک قرار دیتے ہوئے اسلامی تعاون تنظیم اور انسانی حقوق کی دیگر عالمی تنظیموں سے بھی قیدیوں پر تشدد کوعالمی سطح پر اٹھانے کا مطالبہ کیا۔
خیال رہے کہ گذشتہ روز جزیرہ نما نقب کی سینٹرل جیل پر اسرائیلی فوجیوں کے حملے میں کئی قیدی زخمی ہو گئے تھے۔ بغیر کسی پیشگی وارننگ کے صہیونی فوجیوں کے قیدیوں پر حملے نے جیل میں خوف ہراس کی فضاء پیدا کردی۔ آپریشن سے قبل جیل کی بجلی بند کر دی گئی اور تمام اسیران کو ان کی بیرکوں سے باہر نکال کر کھڑا کر دیا گیا۔ بعد ازاں ان کے کمروں اور سامان کی جامہ تلاشی لی گئی۔
بشکریہ:مرکزاطلاعات فلسطین