مغربی کنارے کے شہر نابلس کے نواحی گاؤں قصرہ میں یہودی آباد کاروں نے فلسطینی زرعی اراضی پر دھاوا بولا اور ایک زرعی تعمیر کو منہدم کرنے کے ساتھ ساتھ درجنوں زیتون کے درخت بھی اکھاڑ پھینکے۔
قصرہ کی دیہی کونسل کے سربراہ عبد العظیم وادی نے خبر رساں ایجنسی ”قدس پریس” کو بتایا کہ گاؤں کی اراضی پر قائم ”ییش کوڈش” نامی یہودی بستی کے انتہاء پسند آباد کاروں نے رات گئے گاؤں کے جنوبی زرعی اراضی پر حملہ کیا اور زیتون کے درختوں اور نرسیوں کو اکھاڑنا شروع کردیا۔ حملہ آوروں نے زمین کے مالکان کی جانب سے یہاں تعمیر کیا گیا ایک کمرہ بھی منہدم کرڈالا۔
عبد العظیم وادی نے بتایا کہ اس زرعی اراضی پر یہودی آبادکار چار بار حملہ کر چکے ہیں، یہ زمین علی حسن نامی فلسطینی کی زیر ملکیت ہے اور یہودی آباد کار اس زمین پر قبضہ کرنے کے لیے یہاں پر بار بار حملہ کرتے ہیں تاکہ زمین کا مالک مجبور ہوکر خود ہی یہ جگہ چھوڑ جائے۔
بشکریہ:مرکز اطلاعات فلسطین