مغربی کنارے میں مسلمان اراکین پارلیمان نے فلسطینی اتھارٹی کی سکیورٹی فورسز کے مطالبہ کیا ہے کہ وہ سیاسی بنیادوں پر گرفتار کیے گئے
افراد کو فوری طور پر رہا کر دیں۔ مجلس قانون ساز کے ان اراکین نے سیاسی گرفتاریوں کو بنیادی انسانی آزادیوں کے حق کے منافی قرار دیا۔
سید منیب مصری کی قیادت میں نیشنل الائنس کے وفد کے رام اللہ میں اسلامی پارلمنٹیرینز کے آفس کے دورے کے موقع پر اراکین پارلیمان نے وفد کا پرتپاک استقبال کیا۔ رام اللہ کی رکن پارلیمان ڈاکٹر مریم صالح اور القدس کے دو اراکین وائل حسینی اور احمد عطون نے وفد کے اراکین سے ملاقات کی۔
دوران ملاقات فلسطینی معاملات میں ہونے والی تازہ پیش رفت پر گفتگو کی گئی بالخصوص فلسطینی تنظیموں کے مابین مفاہمت اور غزہ کی پٹی میں الیکشن کمیشن کے کام میں تاخیر، مغربی کنارے میں فلسطینی سکیورٹی فورسز کی جارحیتوں اور سیاسی گرفتاریوں کو شدید تنقید کا نشانہ بنایا گیا۔
اسلامی اراکین پارلیمان نے اتھارٹی کے عقوبت خانوں میں بھوک ہڑتال کرنے والے فلسطینی اسیران کی فوری رہائی اور الخلیل یونیورسٹی میں سیاسی گرفتاریوں کے خلاف اسلامک بلاک کے طلبہ کے دھرنے کی حمایت کا عندیہ دیا۔
فلسطینی مقننہ کے اراکین کا کہنا تھا کہ عبوری حکومت کی تشکیل اور انتخابات کا انعقاد ہی فلسطینی مفاہمت نہیں بلکہ حقیقی مفاہمت کے لیے اتھارٹی فورسز کو مغربی کنارے میں سیاسی بنیادوں پر گرفتاریوں کا سلسلہ روکنا پڑے گا
بشکریہ: مرکز اطلاعات فلسطین