اسرائیلی وزیراعظم بنجمن نیتن یاھو کی ہدایت پر اتوار کے روز مقبوضہ مغربی کنارے کے شہر بیت لحم کے جنوب میں بیتر کالونی میں نسلی دیوار کی تکمیل کے حوالے سے ہونے والی رائے شماری موخر کر دی گئی ہے۔
قبل ازیں اسرائیلی کابینہ کی جانب سے بتایا گیا تھا کہ دیوار فاصل کی تعمیر مکمل کرنے کے لیے رائے شماری آج ہی ہو گی۔
مرکز اطلاعات فلسطین کے مطابق اسرائیلی وزیراعظم کے ایک مقرب ذریعے نے بتایا کہ نیتن یاھو کو اپنی حکومت میں شامل بعض جماعتوں بالخصوص”جیوش ہوم” اور اس کے سربراہ "نفتالی بینت” کی جانب سے سخت دباؤ کا سامنا جو ان سے مغربی کنارے میں کسی قسم کی نسلی دیوار کی تعمیر کے سخت خلاف ہیں۔
ذرائع کا کہنا ہے کہ بیت لحم اور بعض دوسرے مقامات پر دیوار فاصل کا منصوبہ وزیر دفاع موشے یعلون کی تجویز تھی اور تجویز پردونوں اہم رہ نماؤں یعلون اور بینت کے درمیان سخت اختلافات بھی پیدا ہوئے ہیں۔
کابینہ کے اجلاس سے خطاب کرتے ہوئے اسرائیلی وزیراعظم نے کہا کہ بیت لحم کے جنوب اور بیت المقدس سے متصل ‘بیتر’ کالونی میں جہاں دیوار فاصل تعمیر کی جانی ہے وہ جگہ اقوام متحدہ کے ادارہ برائے سائنس و ثقافت کے ہاں ایک اہم تاریخی مقام کے طورپر درج ہے۔ اس لیے فی الوقت ہم نے اس جگہ دیوار کی تعمیر مکمل کرنے کا فیصلہ نہیں کیا اور اس پر رائے شماری اگلے کسی اجلاس میں کی جائے گی۔
بشکریہ:مرکزاطلاعات فلسطین